വടകര : (vatakara.truevisionnews.com) രണ്ടുവർഷം മുമ്പ് അശാസ്ത്രീയ നിർമ്മാണമായ സോയിൽ നയിലിംഗ് പദ്ധതി നടപ്പിലാക്കി തകർന്നു വീണ സ്ഥലത്ത് വീണ്ടും നിർമ്മാണം നടക്കുന്നതിനു മുമ്പ് ജനങ്ങളുടെ ആശങ്ക പരിഹരിക്കണം എന്ന് എസ്ഡിപിഐ വടകര നിയോജകമണ്ഡലം ജോയിന്റ് സെക്രട്ടറി യാസർ അൻസാർ പറഞ്ഞു.
രണ്ടുവർഷം മുമ്പ് നടന്ന അശാസ്ത്രീയ നിർമ്മാണം കാരണം പരിസരവാസികൾ ഏറെ ഭീതിയിലും ദുരിതത്തിലും ആണ് കഴിഞ്ഞു കൊണ്ടിരിക്കുന്നത്.
തകർന്നുവീണ ഉടനെ ശക്തമായ പ്രതിഷേധം രൂപപ്പെട്ടപ്പോൾ പരിസരവാസികളെ മാറ്റിപ്പാർപ്പിക്കുന്നത് ഉൾപ്പെടെ ചെയ്യാമെന്ന് ഉറപ്പുനൽകിട്ടും രണ്ടുവർഷമായിട്ടും തിരിഞ്ഞു നോക്കാത്തവരാണ് ഇപ്പോൾ വീണ്ടും കാലവർഷം പടിവാതിൽക്കൽ എത്തിനിൽക്കെ മണ്ണ് മാന്തി യന്ത്രങ്ങളുമായി വന്നു നിർമ്മാണം തുടങ്ങുന്നത്.
വികസനത്തിന് ജനങ്ങൾ എതിരല്ല പക്ഷേ വികസനത്തിന്റെ പേരിൽ ജനദുരിതം നടപ്പിലാക്കുന്നത് അംഗീകരിക്കാനാവില്ല.
സോയിൽ നെയിലിങ് പദ്ധതി കേരളത്തിന്റെ മണ്ണിൽ അനുയോജ്യമല്ല എന്ന് കരാർ കമ്പനി ഉദ്യോഗസ്ഥരോട് പലരും പറഞ്ഞിട്ടും എസ്ഡിപിഐ ഉൾപ്പെടെയുള്ളവർ നിരവധി തവണ സമരം നടത്തിയിട്ടും ദാർഷ്ട്യത്തോടെ പദ്ധതി നടപ്പിലാക്കുകയായിരുന്നു. മഴ വരുമ്പോഴേക്കും എല്ലാം തകർന്നു വീഴുകയും ജനങ്ങൾ ഏറെ ദുരിതമനുഭവിച്ചതും നമ്മുടെ മുമ്പിൽ നേർ സാക്ഷ്യമാണ്.
ഇത്തരം ഒരു സാഹചര്യത്തിൽ ജനങ്ങൾക്ക് പ്രയാസമില്ലാത്ത വിധം നിർമ്മാണ പ്രവർത്തികൾ ജാഗ്രതയോടെ കൈകാര്യം ചെയ്യണമെന്നും പ്രദേശത്തെ ജനങ്ങളുടെ ആശങ്ക പരിഹരിക്കണം എന്നും അദ്ദേഹം കൂട്ടിച്ചേർത്തു.
The construction in Mukkali, where soil nailing construction collapsed, should address the concerns of the people: SDPI
