വടകര: (vatakara.truevisionnews.com) പ്രമുഖ കവിയും സാംസ്കാരിക പ്രവർത്തകനുമായിരുന്ന മൂടാടി ദാമോദരന്റെ സ്മരണാർത്ഥം വടകര സാഹിത്യവേദി സംഘടിപ്പിച്ച അനുസ്മരണവും പുരസ്കാര സമർപ്പണവും സാഹിത്യലോകത്തിന് ആവേശമായി.
കേരള സാഹിത്യ അക്കാദമി സെക്രട്ടറി സി.പി. അബൂബക്കർ ചടങ്ങ് ഉദ്ഘാടനം ചെയ്യുകയും മൂടാടി സ്മാരക പുരസ്കാരം സുബിൻ അമ്പിത്തറയിലിന് സമ്മാനിക്കുകയും ചെയ്തു. പ്രശസ്ത കവി വീരാൻകുട്ടി അധ്യക്ഷത വഹിച്ച ചടങ്ങിൽ മൂടാടി ദാമോദരന്റെ സ്മരണകൾ പങ്കുവെച്ചതോടൊപ്പം അദ്ദേഹത്തിന്റെ സാഹിത്യ സംഭാവനകളെയും പ്രഭാഷണത്തിൽ അനുസ്മരിച്ചു.
ചടങ്ങിലെ മറ്റൊരു പ്രധാന ആകർഷണം മൂടാടി ദാമോദരന്റെ സമ്പൂർണ്ണ കവിതകളുടെ പ്രകാശനമായിരുന്നു. പ്രശസ്ത എഴുത്തുകാരൻ പി.കെ. പാറക്കടവ് പുസ്തകം പ്രകാശനം ചെയ്യുകയും ഡോ. എ.കെ. രാജൻ ആദ്യപ്രതി ഏറ്റുവാങ്ങുകയും ചെയ്തു.
കെ.വി. സജയ് പുസ്തകം പരിചയപ്പെടുത്തി സംസാരിച്ചു. സാംസ്കാരിക മേഖലയിലെ പ്രമുഖരായ ഡോ. കെ.എം. ഭരതൻ, പി.പി. ദാമോദരൻ, ടി.കെ. വിജയരാഘവൻ, പുറന്തോടത്ത് ഗംഗാധരൻ, തയ്യുള്ളതിൽ രാജൻ, പി.പി. രാജൻ, പുരസ്കാര ജേതാവ് സുബിൻ അമ്പിത്തറയിൽ തുടങ്ങിയവർ ചടങ്ങിൽ സംസാരിച്ചു.
Moodadi Damodaran's commemoration and book launch held in Vadakara
